सांटा बार्बारा

आकाशातील रक्त छटांचे फटकारे वितळले

फिरून पुन्हा उगवून आली धमक्क पिवळी फुले।

खारी फिरती शेपट्यांचे फुलारून झुबके
झरे लागले पुनःश्च वाहू अवखळ आणि खुळे।

पंख पसरुनी परतू लागले पेलीकनांचे थवे
वाळूवरती ऋतूराजाची वाजतात पाऊले!

१९ एप्रिल २०१२

झाडे आणि गांडुळे

दमदार वृक्ष उभे असतात ज्या जंगलात,

गांडूळांची मोठी फौज कार्यरत असते तिथल्या मातीत.

काही झाडांना जाणीव असते त्यांच्या वृद्धीतील गांडूळांच्या योगदानाची. 

ते जेव्हा सांगतात गांडूळांना, कि गांडुळे किती थोर आहेत,

तेव्हा गांडुळे म्हणतात, वा! वा! किती विनयशीलता! किती थोर आहे हे झाड!

गांडुळे कधीच खऱ्या अर्थाने थोर ठरत नाहीत.

कारण ती असतात आदत से मजबूर!

वृक्ष वाढावेत म्हणून नसतात ती राबत!

स्वतःच्या पोटासाठी मिळावेत काही मेलेले किडे आणि कुजकी पाने

म्हणून जमिनीच्या खालून फिरत रहातात ती माती उकरत उकरत…

थोर न ठरण्याबद्दल नसतेच गांडूळांची तक्रार!

मग या साऱ्याचा मी का करतीये विचार?

२२ मार्च १५

Covid case

The organ that sings is jeopardised.

My heart beats up fast, urges it to sing,

But the bellows sink into deep damp slumber. 

My brain urges it to speak, but the chords have been silenced, by the weight of my own heart.

I am deeply poisoned by what they call just a RNA... but more than that by the grief of my own inability to speak up, to sing and to dance.

I will lie down.. in prone position, with my head down.

And I hope, one day I will be able to leap up like a cheetah, and grab those by their throat, who have choked me, and make them struggle for their breath, as I do now!

14 May 2021

चळवळीची कविता

पाऊस, पाणी, माती, बियाणी,

सारं सारं खरं गं माय,

पण उरी फुटून निघाल्यावाचून 

सांग कोंभ येईल काय?

गिरण्या, चिमण्या , जनरेटरांची 

अखंड घरघर खरी रे बाबा 

पण तुझ्या मनगटाच्या आघाताविण 

सांग पोलाद लवेल काय?

हाडे, स्नायू, कुर्चा, कातडी 

हे सारे तर हवेच राव ,

पण हृदयातील स्फुल्लिंगावाचून

रक्त अंगभर फिरेल काय?

शांती, स्थिरता, सहनशीलता 

यांचा आम्हा अनंत ध्यास!

पण संघर्षावाचून येथे घेता

न येतसे मोकळा श्वास!

21 May 2021